Westerås Gard har både hytter, leilegheiter og eigen låverestaurant med ei spektakulær utsikt over fjord og fjell. I tillegg er garden eit glimrande utgangspunkt for fotturar i fjellet med turstiar som startar rett utanfor døra. Garden har vore i familien heilt sidan 1600 talet og er ein av tre gardar i Geiranger som framleis er i drift. Westerås hytteutleige og restaurant ligg på Vesterås, om lag 4 km frå sentrum, med flott utsikt over turistbygda Geiranger. Ta fylkesveg 63 i retning Grotli, køyr 3 km til du kjem til Hole bru, ta av til venstre og køyr langs ein grusveg siste kilometeren. Då er du framkomen. I låven finn du spisestedet som også fungerer som resepsjon. Westerås Gard har 2 leilegheiter, 5 høgstandardhytter og eit rom til utleige som vi leiger ut i perioden mai - september. I restauranten serverer vi til både bryllup, barnedåp og selskap. Vi har ope kvar dag frå juni til ut august, og litt variert opningstider i mai og september.

Når ikkje vi har ope på Vesterås jobber eg ekstra på omsorgsenteret i Geiranger. Ellers så forbereder eg meg til neste sesong. Tek imot bestilling på feiringar, overnattingar og planlegg kommande sesong. Mannen min Arnfinn køyrer skulebussen og litt buss utanom, i tillegg til at han er med i det lokale brannkorpset. Sjølvsagt er han også i fjøsen morgon og kveld. Når den fyrste snøven kjem og legg seg på Vesterås i oktober - november tek vi og flyttar alle dyra ifrå Vesterås bort til fjøsen på Utsikten. Der er det trygt for snøras og lettare å komme til.

Frå Vesterås kan du gå opp til Storseterfossen, ein spektakulær foss som det går an å gå bak. Du kan også ta turen til Løsta, Vesteråsfjellet eller Grindalen. Om du vil på ein lenger tur kan du gå på Laushornet eller Vinsåshornet. På Vesterås er det satt opp ei stor tavle som viser dei forskjellige fjellturane. Om du vil bruke bilen ta deg ein tur til Dalsnibba, europas høgaste fjelltopp med fjordutsikt der ein kan køyre bil heilt opp på toppen. Ikkje gå glipp av Geirangerfjorden, kom eller reis via fjorden eller ta ein tur med sightseeingbåten medan du er her. Om du er her over fleire dager ta deg ein dagstur til Ålesund eller Atlanterhavsveien via Trollstigen. Her er mange gode spisesteder, ta deg ein prat med betjeningen og få fleire gode alternativ.